Dainik Maval News : पक्षनिष्ठा काय असते? किंवा पक्षाचा आदेश कसा मानावा आणि पक्ष शिस्त कशी असते, याचे मूर्तिमंत उदाहरण म्हणून सध्या मावळ तालुक्यातील काँग्रेस पक्षाकडे पाहावं लागेल. पक्षाची शिस्त मोडल्याने काँग्रेसने मावळातील ज्येष्ठ नेते माउलीभाऊ दाभाडे यांच्यावर थेट निलंबनाची कारवाई केली. त्यांना सहा वर्षांसाठी पक्षातून काढून टाकण्यात आले. दुसरीकडे मावळ विधानसभेची जागा महायुतीत आपल्या वाट्याला न आल्याने मावळ भाजपाच्या प्रमुख नेत्यांनी पदांचे राजीनामे देत थेट पक्षाच्या निर्णयाला आव्हान दिले. तसेच सर्व पदाधिकाऱ्यांनी अपक्ष उमेदवाराला पाठींबा जाहीर केला. पक्षाच्या प्राथमिक सदस्यत्वाचा राजीनामा न देता फक्त पदांचा राजीनामा देत अपक्ष उमेदवाराला पाठिंबा देणाऱ्या या नेत्यांवर पक्षाकडून अद्याप कोणतीही कारवाई केली गेली नाहीये, हे विशेष.
मावळच्या निमित्ताने राज्याच्या राजकारणात एवढी मोठी घटना घडून गेली. मात्र, प्रदेश भाजपाकडून याबाबत अद्याप साधी प्रतिक्रिया देखील आलेली नाही. भाजपाचे प्रदेशाध्यक्ष बावनकुळे आणि उपमुख्यमंत्री देवेंद्र फडणवीस यांच्याकडून या घटनेबाबत साधा चकार शब्द देखील उच्चारण्यात आलेला नाही. दुसरीकडे भाजपाचे जेष्ठ नेते अमित शहा म्हणतात बंडखोरी थांबवा. परंतु, या प्रकरणात पक्षश्रेष्ठी यांची चुप्पी म्हणजे बंड करणाऱ्या पदाधिकाऱ्यांना आतूनच पाठिंबा आहे काय? असा सवाल उपस्थित होताना दिसतो.
राष्ट्रवादी हा महायुतीचा घटक पक्ष आहे. आमदार शेळके हे महायुतीतील उमेदवार आहेत. असे असताना महायुतीतील घटक पक्ष राष्ट्रवादी (अजित पवार) पक्षाचे अधिकृत उमेदवार सुनील शेळके यांच्याविरोधात अपक्ष निवडणूक लढण्याचे जाहीर केलेल्या ‘राष्ट्रवादी’चे बंडखोर उमेदवार बापूसाहेब भेगडे यांना मावळ भाजपाने पाठिंबा दिला आहे. त्यासाठी स्थानिक भाजपाच्या माजी आमदारांसह पदाधिकाऱ्यांनी पक्षाची शिस्त मोडत आपल्या पदांचा राजीनामा दिला आहे. त्यांच्यावर अद्याप कारवाई न केल्याने पक्षाची शिस्त फक्त बोलण्यापूरती आहे का? याची चर्चा होऊ लागली आहे.
मावळ भाजपा आणि प्रदेश कार्यकारणी यांच्यात समन्वय होत नाही, तोपर्यंत आपली उमेदवारी जाहीर करू नये, अशी भूमिका आमदार शेळके यांनी घेतली होती. उपमुख्यमंत्री देवेंद्र फडणवीस यांचीही त्यांनी भेट घेतली. त्याच्या दुसऱ्याच दिवशी भाजपचे माजी आमदार बाळा भेगडे यांनीही फडणवीस यांची भेट घेतली. भेगडे हे फडणवीस यांचे निकटवर्तीय मानले जातात. त्यामुळे भेगडे यांच्यासह मावळ भाजपकडून बंडखोर उमेदवाराला पाठिंबा देण्याचा निर्णय होईल, अशी शक्यता वाटत नव्हती. परंतु, बापू भेगडे यांनी अपक्ष निवडणूक लढविण्याची घोषणा करताच भाजपचे प्रदेश उपाध्यक्ष बाळा भेगडे, किसान मोर्चाचे प्रदेशाध्यक्ष गणेश भेगडे यांनी पदांचे राजीनामे देऊन त्यांना पाठिंबा दिला. अर्थात त्यांनी अजून पक्षाच्या सदस्यत्वाचा राजीनामा दिलेला नाही.
ज्या पद्धतीने काँग्रेसने त्वरित पक्षाचे ज्येष्ठ नेते दाभाडे यांचे निलंबन करीत मागच्यांना सावधानतेचा इशारा दिला, तसं धाडस भाजपचे पक्षश्रेष्ठी मावळचे माजी आमदार बाळा भेगडे यांच्यासह इतर पदाधिकाऱ्यांवर कारवाई करून दाखवतील काय? सद्यस्थितीत तरी, भाजपकडून अशा हालचाली होताना दिसत नाहीत. नैतिकता, सुसंस्कृतपणा, साधनसुचिता, विचाराशी बांधिल असलेला आणि केडरबेस पक्ष म्हणून भाजपची आजपर्यंतची ओळख आहे. मात्र, अशा प्रकरणामुळे भाजपाची असलेली ही ओळख पुसट बनत चालली आहे, अशी कुजबुज राजकीय जाणकारांमध्ये सुरु आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– मावळात शरद पवारांचा अजितदादांना धक्का ! अपक्ष उमेदवार बापूसाहेब भेगडे यांचं काम करण्याचे पदाधिकाऱ्यांना आदेश
– मावळात ‘अपक्ष’ उमेदवार बापूसाहेब भेगडे यांना महाविकास आघाडीचा पाठिंबा ? लवकरच होणार घोषणा । Maval Vidhan Sabha
– मतदानाचा टक्का वाढविण्यासाठी मावळ विधानसभेत मतदार जनजागृती अभियान, विद्यार्थ्यांनी काढली प्रभातफेरी । Maval Vidhan Sabha
