‘सत्ताधाऱ्यांच्या आदेशाने रस्त्याची रुंदी आणि दिशा बदलल्यास…काम थांबवू’, वडगाव भाजपचा सार्वजनिक बांधकाम विभागाला इशारा

वडगाव मावळ शहरात मागील एक वर्षापासू वडगाव बाजारपेठेतील मुख्य रस्त्याचे काम सुरु आहे. मात्र, या विकासकामाला विलंब होत असल्याने तसेच त्यामुळे नित्याची वाहतूक कोंडीची समस्या उद्भवत असल्याने नागरिकांची गैरसोय होत आहे. या सर्व पार्श्वभूमीवर वडगाव भाजपाने सार्वजनिक बांधकाम विभागाला महत्वाचे निवेदन दिले आहे, त्यात वडगाव नगरपंचायतमधील सत्ताधाऱ्यांच्या सांगण्यानुसार रस्त्याची दिशा आणि रुंदी ठरवण्याचा घाट घातला जात आहे. त्यामुळे कुणाच्याही सांगण्यानुसार आणि त्यांच्या सोईनुसार तुम्ही पुढे रेटत असलेल्या कामाचा आम्ही जाहीर निषेध करतो, असे ठणकावण्यात आले आहे. ( BJP Statement To Public Works Department Regarding Road Construction In Vadgaon Maval City )

दैनिक मावळचा व्हॉट्सअ‍ॅप ग्रुप जॉइन करण्यासाठी इथे क्लिक करा

“श्री खंडोबा मंदिरापासून श्री महादेव मंदीरासमोरील कोपऱ्यापर्यंतच्या रस्त्याच्या कामाची आखणी करताना आणि प्रत्यक्ष काम करताना ठिकठिकाणी आपण हेतुपुरस्सर राष्ट्रवादी काँग्रेस पदाधिकारी आणि कार्यकर्त्यांच्या घर व दुकानासमोरील ओटे वाचवण्यासाठी त्यांच्याच समोरील बाजूस असलेल्या भाजपा कार्यकर्त्यांच्या घराच्या आणि दुकानाच्या थेट उंबऱ्यावर देखील हातोडा टाकला आहे. सदर रस्त्याचे बांधकाम पुर्णत्वास नेत असताना आपण करत असलेले काम मनमानी आणि एका बाजूला झुकत्या स्वरुपाचे आहे. या रस्त्याच्या कामात सर्वांना समान नियम लागू होणे अपेक्षित असताना नगरपंचायतमधील सत्ताधाऱ्यांच्या सांगण्यानुसार चालू असलेले काम अत्यंत चुकीचे आहे”, असा गंभीर आरोप भाजपाकडून करण्यात आला आहे.

हेही वाचा – वडगाव शहर पाणीपुरवठा योजनेवरुन राजकारण तापलं! ‘अपयश झाकण्यासाठी त्यांचा केविलवाणा प्रयत्न सुरु’, अनंता कुडेंची बोचरी टीका

तसेच, “यापुढील रस्त्याचे बांधकाम करताना बाजारपेठेमध्ये ठरलेल्या रुंदीनुसार रस्त्याच्या दोन्ही बाजूला असलेली घरे किंवा दुकाने यांना समसमान नियम लावावा. मोकळी जागा आणि नगरपंचायत मधील सत्ताधारी यांच्या सोयीनुसार रस्त्याची दिशा व रुंदीमध्ये बदल करु नये. वडगाव मधील रोड चे बाजूला आसलेले व्यवसायिक व नागरिक यांना न्याय मिळवून द्यावा, अन्यथा अन्यायी व एककल्ली पद्धतीने चालू असलेले रस्त्याचे काम वडगाव शहर भाजपाच्या वतीने तत्काळ थांबविण्यात येईल,” असा इशारा शहराध्यक्ष अनंता कुडे यांनी सार्वजनिक बांधकाम विभागाला दिला आहे.

याप्रसंगी माजी सभापती गुलाबराव म्हाळसकर, गटनेते दिनेश ढोरे, मा प्रभारी सरपंच संभाजी म्हाळसकर, वडगाव भाजपा कार्याध्यक्ष प्रसाद पिंगळे, संघटन मंत्री किरण भिलारे, नगरसेवक किरण म्हाळसकर, ऍड विजयराव जाधव, भूषण मुथा, संतोष म्हाळसकर, सरचिटणीस कल्पेश भोंडवे, मकरंद बवरे, रविंद्र म्हाळसकर, शरद मोरे, हरीश दानवे, संतोष द.म्हाळसकर आदी उपस्थित होते.

अधिक वाचा –

– उकळते कालवण अंगावर सांडले, साडेतीन वर्षांचा मुलगा गंभीर जखमी, पिपोळीतील घटना
– कुटुंबातील कुणी कर्जदार व्यक्ती कोरोनाने गेला असल्यास ही बातमी नक्की वाचा, सहकार विभागाचा दिलासादायक निर्णय