Dainik Maval News : इंदुरी ( ता. मावळ ) येथील तोलानी मेरीटाईम इन्स्टिट्यूटमध्ये बास्केटबॉलचा खांब अंगावर पडून झालेल्या विद्यार्थी मृत्यू प्रकरणी आता मोठी कारवाई करण्यात आली आहे. या घटनेला महाविद्यालय प्रशासनाचा बेजबाबदारपणा कारणीभूत असल्याचे मानून पोलिसांनी संस्थेच्या प्राचार्यांसह एकूण चार जणांविरुद्ध गुन्हा दाखल केला आहे.
खेळाच्या साहित्याकडे दुर्लक्ष करणे कॉलेज प्रशासनाला आता चांगलेच महागात पडले असून या कारवाईमुळे शैक्षणिक वर्तुळात मोठी खळबळ उडाली आहे. याप्रकरणी मयत विद्यार्थ्याचा भाऊ अशोक बाबुराम वर्मा (वय २७, रा. उत्तर प्रदेश) यांनी तळेगाव एमआयडीसी पोलीस ठाण्यात तक्रार दिली आहे.
त्यानुसार पोलिसांनी तोलानी मेरीटाईम इन्स्टिट्यूटचे प्राचार्य संजित कान्गो (वय ५९), मैदानाची देखभाल करणारे कर्मचारी, क्रीडा प्रमुख आणि संस्थेचे व्यवस्थापक यांच्यावर गुन्हा नोंदवला आहे. ५ एप्रिल रोजी ही दुर्घटना घडली होती, मात्र सखोल तपासानंतर पोलिसांनी आता या जबाबदार पदाधिकाऱ्यांविरुद्ध कायदेशीर बडगा उगारला आहे.
मैदानातील बास्केटबॉलचा लोखंडी खांब अत्यंत जुनाट आणि गंजलेल्या स्थितीत होता. विशाल वर्मा हा विद्यार्थी व्यायाम करत असताना हा खांब मुळापासून उखडून त्याच्या डोक्यात पडला, ज्यात त्याचा जागीच मृत्यू झाला होता.
सदर खांब धोकादायक अवस्थेत असतानाही त्याची वेळीच डागडुजी किंवा देखभाल करण्यात आली नाही, असा ठपका फिर्यादीने ठेवला आहे. कॉलेज प्रशासनाच्या या हलगर्जीपणामुळे एका तरुणाला आपला जीव गमवावा लागल्याने संताप व्यक्त केला जात असून, पोलीस या प्रकरणाचा अधिक तपास करत आहेत.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मावळमधील बौर, करूंज, ब्राम्हणवाडी येथील प्रस्तावित एमआयडीसीसाठी जमीन खरेदी-विक्रीचे व्यवहार तात्पुरते बंद
– तळेगाव दाभाडे शहरवासीयांना पाणी प्रश्नाबाबत मोठा दिलासा ! आंद्रा धरणातून ५.०१४ MCM पाणी आरक्षणास मंजुरी
– गणपूर्ती होत नसल्याने मावळ तालुका कृषी उत्पन्न बाजार समिती बरखास्त ! प्रशासक म्हणून सहाय्यक निबंधक नवनाथ अनपट यांची नियुक्ती
– वडगाव मावळ येथे स्व. पै. केशवराव ढोरे प्रतिष्ठान आयोजित १३ व्या सामुदायिक विवाह सोहळ्यात सात जोडप्यांचे शुभमंगल सावधान
