Dainik Maval News : मावळ तालुक्यातील विविध प्रलंबित विकासकामांना गती देण्यासाठी आणि नागरिकांचे प्रश्न मार्गी लावण्यासाठी विधानभवन पुणे येथे आमदार सुनील शेळके यांच्या अध्यक्षतेखाली आणि जिल्हाधिकारी जितेंद्र डुडी, पीएमआरडीए (PMRDA) आयुक्त डॉ. अभिजीत चौधरी तसेच संबंधित विभागांच्या वरिष्ठ अधिकाऱ्यांच्या उपस्थितीत महत्त्वपूर्ण बैठक शुक्रवारी (दि. २२) पार पडली.
सदर बैठकीत मावळ तालुक्यातील प्रमुख पर्यटन स्थळांचा विकास आणि रस्ते सुधारणेबाबत अत्यंत ठोस निर्णय घेण्यात आले. या बैठकीत टायगर व लायन्स पॉईंटकडे जाणाऱ्या रस्त्याची निविदा प्रक्रिया पूर्ण होऊन १० महिने उलटले तरी कामात गती नसल्याबद्दल आमदार शेळके यांनी प्रशासनाकडे तीव्र नाराजी व्यक्त केली; तसेच हा रस्ता १५ मीटर रुंदीचा नियोजित असला आणि काही भागात भूसंपादन करावे लागणार असले, तरी कामात अधिक विलंब होऊ नये म्हणून सध्या अस्तित्वात असलेल्या १० मीटर रुंदीच्या रस्त्याचे सुधारणा व सुशोभीकरणाचे काम तातडीने सुरू करण्याचे आदेश देण्यात आले.
या सोबतच लोणावळा नगरपरिषद हद्दीतील रस्त्याची शासकीय मोजणी सोमवार, दिनांक २५ मे २०२६ रोजी करून हे काम त्वरित सुरू करण्याचे निर्देश देण्यात आले. लोणावळा जवळील प्रस्तावित ‘स्काय वॉक’ प्रकल्पासाठी पवना धरणातून वनविभागाच्या हद्दीतून १० किलोमीटर अंतराची पाण्याची लाईन टाकणे आवश्यक असल्याने, त्यासाठी वनविभागाच्या परवानगीचा प्रस्ताव तातडीने सादर करण्याच्या सूचना संबंधित अधिकाऱ्यांना देण्यात आल्या.
आगामी आषाढी एकादशी आणि जगद्गुरु संत तुकाराम महाराज पालखी सोहळ्याचे पावित्र्य व महत्त्व लक्षात घेऊन देहू-येलवाडी रस्त्याच्या कामावरही सविस्तर चर्चा करण्यात आली असून, वारकरी बांधवांना व प्रवाशांना कोणताही त्रास होऊ नये यासाठी पालखीच्या अनुषंगाने हे काम युद्धपातळीवर सुरू करण्याचे आदेश देण्यात आले आहेत. प्रशासनाला सर्व कामे वेळेत पूर्ण करण्याचे निर्देश दिले असून, या बैठकीला जिल्हा नियोजन अधिकाऱ्यांसह संबंधित सर्व विभागांचे शासकीय अधिकारी उपस्थित होते.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा :
– पवना नदीचे पाणी पिण्याअयोग्य, बंदिस्त जलवाहिनीबाबत तोडगा काढा ; खासदार श्रीरंग बारणे यांचे मुख्यमंत्र्यांना साकडे
– आमदार सुनील शेळके यांच्या पुढाकारातून बौर, ब्राह्मणवाडी, करूंज येथील प्रस्तावित एमआयडीसी संदर्भात जिल्हाधिकारी कार्यालयात बैठक संपन्न
– वडगाव मावळ येथे इंद्रायणी भात बियाण्याचे वितरण केंद्र सुरू ; शेतकऱ्यांना मिळणार उच्च दर्जाचे बियाणे
