Dainik Maval News : मावळ तालुक्यात पावसाचे अनियमित आणि अपुरे प्रमाण यामुळे यावर्षी तालुक्यातील मुख्य पीक असलेले भातपीक करपू लागले असून, इतर पिकांचेही नुकसान होत आहे. पावसाअभावी शेतकऱ्यांवर आर्थिक संकट ओढवण्याची शक्यता निर्माण झाली आहे. या परिस्थितीचे गांभीर्य लक्षात घेऊन मावळ तालुका दुष्काळग्रस्त जाहीर करावा आणि दुष्काळग्रस्त तालुक्यांना शासनाकडून देण्यात येणाऱ्या विविध सवलती व लाभ येथील शेतकऱ्यांनाही मिळावेत, अशी मागणी करण्यात आली आहे. यासंदर्भात शेतकऱ्यांच्या उपस्थितीत मावळचे तहसीलदार विक्रम देशमुख यांना निवेदन देण्यात आले.
मावळ तालुक्यातील अनेक भागांत पावसाचे प्रमाण अनियमित राहिल्याने भातपिकाला मोठा फटका बसत आहे. शेतातील भातरोपे पाण्याअभावी करपू व वाळू लागली आहेत. भात हे तालुक्यातील प्रमुख पीक असल्याने त्याचे नुकसान झाल्यास शेतकऱ्यांच्या उत्पन्नावर मोठा परिणाम होण्याची शक्यता आहे. त्याचबरोबर इतर पिकांनाही पावसाच्या कमतरतेचा फटका बसत असल्याने शेतकरी चिंतेत आहेत.
सध्याची शेतीची परिस्थिती, पिकांचे होणारे नुकसान आणि आगामी काळातील संभाव्य पाणीटंचाई यांचा प्रशासनाने गांभीर्याने विचार करावा. मावळ तालुक्यातील शेतीच्या परिस्थितीची पाहणी करून वस्तुस्थिती शासनाच्या निदर्शनास आणून द्यावी. तसेच तालुका दुष्काळग्रस्त घोषित करण्यासाठी शासनाकडे तातडीने पाठपुरावा करावा, अशी मागणी निवेदनाद्वारे करण्यात आली.
दुष्काळग्रस्त घोषित करण्यात आलेल्या तालुक्यांतील शेतकऱ्यांना शासनाकडून विविध सवलती आणि मदतीचे लाभ दिले जातात. त्याच धर्तीवर मावळ तालुक्यातील शेतकऱ्यांनाही आवश्यक मदत मिळावी. पावसाअभावी होणाऱ्या पिकांच्या नुकसानीमुळे शेतकऱ्यांना आर्थिक अडचणींचा सामना करावा लागू नये, यासाठी प्रशासनाने तातडीने पावले उचलावीत, अशी भूमिका शेतकऱ्यांनी मांडली.
प्रशासन या मागणीची दखल घेऊन शासनाकडे कोणती भूमिका मांडते आणि मावळ तालुक्यातील शेतकऱ्यांना दिलासा देण्यासाठी कोणती पावले उचलली जातात, याकडे शेतकरी वर्गाचे लक्ष लागले आहे.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा
– “भात, सोयाबीन पिकांचे तातडीने पंचनामे करा” – परिस्थितीचा योग्य विचार करून मावळात दुष्काळ जाहीर करा – सभापती सुनीता मनोज येवले
– “स्व. अजितदादा पवार वैकुंठ रथाचे लोकार्पण” वडगाव नगरीचे उपनगराध्यक्ष सुनील गणेशआप्पा ढोरे यांचा वाढदिनी आदर्शवत उपक्रम
– मावळ तालुक्यात महायुतीत पुन्हा जुंपली
