मावळ लोकसभेचे विद्यमान खासदार श्रीरंग बारणे यांना खासदारकीची हॅट्रीक करायची आहे. परंतू तिसऱ्यांदा खासदार होण्याची बारणेंची ही इच्छा पूर्ण होणे कठीण दिसतंय. कारण प्रत्यक्ष निवडणूकीच्या रिंगणाआधीच उमेदवारी मिळवण्यासाठी बारणेंना महायुतीतील मित्र पक्षांचे रिंगण पार करावे लागणार आहे. आधी राष्ट्रवादीचे आमदार सुनिल शेळके यांनी प्रकटपणे केलेला विरोध, त्यानंतर भाजपाचे माजी आमदार बाळा भेगडे यांच्या कार्यकर्त्यांनी केलेली तिकीटाची मागणी, यामुळे आधीच मावळच्या जागेबद्दल युतीत तिढा निर्माण झालाय. अशात आता भाजपाच्या चिंचवड विधानसभेतील पदाधिकारी-कार्यकर्ते यांनी पक्ष नेतृत्वाकडे नवी मागणी केलीये. मावळ लोकसभेसाठी भाजपाचे शहराध्यक्ष शंकर जगताप यांना उमेदवारी द्यावी, अशी मागणी कार्यकर्ते – पदाधिकारी यांनी केलीये. ( मावळ, पिंपरी-चिंचवड, पुणे परिसरातील ताज्या अपडेट्ससाठी दैनिक मावळचा व्हॉट्सअ‍ॅप चॅनेल जॉईन करा )
‘महायुतीत मावळची जागा भाजपला मिळावी. शहराध्यक्ष जगताप यांना उमेदवारी द्यावी. शहराध्यक्ष म्हणून जगताप करत असलेले कार्य याचा विचार करून त्यांना उमेदवारी दिल्यास त्यांचा विजय निश्चित होईल. शिवाय महायुती तसेच भाजपाला विशेष फायदा होईल,’ अशा मागणीचे निवेदन भाजप शहर चिटणीस सचिन काळभोर यांनी उपमुख्यमंत्री देवेंद्र फडणवीस यांना दिले आहे. सन 2014 च्या निवडणुकीत शंकर जगताप यांचे बंधू दिवंगत आमदार लक्ष्मण जगताप यांनी शेकापकडून निवडणूक लढविली होती. त्याचाही फायदा पक्षाला तसेच महायुतीला होऊ शकतो. त्यामुळे शंकर जगताप यांना उमेदवारी देण्याची मागणी काळभोर यांनी केली आहे. ( demand for nomination of bjp shankar jagtap in maval lok sabha constituency shiv sena mp shrirang barane in trouble )
मुख्यमंत्री एकनाथ शिंदे यांच्या शिवसेनेचा खासदार असलेल्या या मावळ लोकसभा मतदारसंघावर आता भाजपाने दोन बाजूंनी प्रबळ दावा केला आहे. आधी भाजपाचे मावळचे माजी आमदार माजी राज्यमंत्री बाळा भेगडे आणि त्यानंतर आता पिंपरी-चिंचवड भाजपाचे शहराध्यक्ष शंकर जगताप यांना उमेदवारी देण्याची मागणी उपमुख्यमंत्री देवेंद्र फडणवीस यांच्याकडे करण्यात आली आहे. त्यामुळे एकनाथ शिंदे यांच्यासमोरील अडचणी वाढल्या आहेत. बारणे यांच्यासाठी तर हा मोठा धक्काच आहे. त्यामुळे यातून नेमका कसा मार्ग काढला जातो, हे पाहणे औत्स्युक्याचे ठरणार आहे.
अधिक वाचा –
– महासंगणकाचे जनक आणि ज्येष्ठ संगणक शास्त्रज्ञ डॉ. विजय भटकर यांना 2024 चा पुण्यभूषण पुरस्कार जाहीर । Pune News
– ‘पीडित मुलीला न्याय मिळाला, आता त्या कुटुंबाच्या पाठीशी शेवटपर्यंत राहणार’, कोथूर्णे निर्भया प्रकरणावर आमदार सुनिल शेळकेंची प्रतिक्रिया
– शिरगाव येथील ‘त्या’ मृत शेतकऱ्याच्या कुटुंबाला महावितरणकडून 4 लाखांची नुकसानभरपाई, आमदार शेळकेंनी आमसभेत दिले होते आदेश
