Dainik Maval News : लोणावळा शहराच्या सर्वांगीण विकासासाठी पुणे जिल्हाधिकारी कार्यालयात जिल्हाधिकारी जितेंद्र डूडी यांच्या अध्यक्षतेखाली अत्यंत महत्त्वपूर्ण बैठक पार पडली. मुंबई–पुणे या दोन महानगरांच्या मध्यवर्ती ठिकाणी व निसर्गसौंदर्याने नटलेल्या लोणावळा शहराला पाश्चिमात्य देशांच्या धर्तीवर जागतिक ओळख मिळावी, या दृष्टीने विविध विकासात्मक मुद्द्यांवर सखोल चर्चा करण्यात आली.
या बैठकीत शहरातील प्रमुख रस्त्यांचे सुशोभीकरण, ट्रॅफिक व्यवस्थापन, कचरा व्यवस्थापन, फूटपाथ सुधारणा, भूमिगत विद्युतवाहिन्या, पथदिवे, पार्किंग झोन, पिण्याच्या पाण्याचे नियोजन, अतिक्रमण नियंत्रण, जंक्शन सुधारणा तसेच हॉकर्स झोन निर्मिती यांसारख्या महत्त्वपूर्ण बाबींचा आराखडा सादर करण्यात आला. विशेष म्हणजे, AI तंत्रज्ञानाच्या सहाय्याने CCTV द्वारे वाहतूक व सुरक्षा नियंत्रण अधिक प्रभावी करण्यावरही भर देण्यात आला.
याचबरोबर 2027 मध्ये होणाऱ्या “Pune Grand Tour Cycle Race” या आंतरराष्ट्रीय स्पर्धेचा मार्ग मावळ तालुक्यातून जाणार असून, जागतिक दर्जाचे खेळाडू लोणावळ्यात येणार असल्याने शहराच्या पर्यटन व आर्थिक विकासाला मोठी चालना मिळणार आहे. या पार्श्वभूमीवर शहरातील पायाभूत सुविधांचा दर्जा उंचावण्याच्या दृष्टीने ही बैठक अत्यंत निर्णायक ठरली.
या बैठकीत आमदार सुनील शेळके उपस्थित होते. लोणावळा शहराच्या विकासासाठी त्यांची असलेली तळमळ आणि दूरदृष्टी पुन्हा एकदा अधोरेखित झाली. शहरात नवीन प्रकल्प यावेत, उद्योग-व्यवसायाला चालना मिळावी व स्थानिकांना रोजगाराच्या संधी निर्माण व्हाव्यात, यासाठी आमदार शेळके सातत्याने पुढाकार घेत असल्याचे यावेळी स्पष्ट झाले. त्यांच्या नेतृत्वाखाली लोणावळ्याचा सर्वांगीण विकास साध्य करण्यासाठी प्रशासन व लोकप्रतिनिधी यांच्यातील समन्वय अधिक मजबूत होत असल्याचेही दिसून आले.
बैठकीस लोणावळा नगरपरिषदेचे नगराध्यक्ष राजेंद्र सोनवणे यांच्यासह सर्वपक्षीय नगरसेवक मोठ्या संख्येने उपस्थित होते. सर्वांनी एकमताने या विकास आराखड्यास सकारात्मक प्रतिसाद देत लोणावळा शहराच्या उज्ज्वल भविष्यासाठी कटिबद्ध असल्याचा विश्वास व्यक्त केला. या सकारात्मक पुढाकाराबद्दल सर्व नगरसेवकांच्या वतीने जिल्हाधिकारी महोदयांचे आभार व्यक्त करण्यात आले.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा :
– पुणे जिल्हा परिषदेचे चार विषय समित्यांचे सभापती ठरले ; मावळ, वेल्हे, हवेली, इंदापूर तालुक्यांना मिळाला मान
– ‘सुनेत्रा वहिनींनी राज्याच्या मुख्यमंत्रिपदी विराजमान व्हावं…’ – आमदार सुनील शेळके
– राज्यात आजपासून ‘माझं गाव, आरोग्य संपन्न गाव’ अभियानाला प्रारंभ ; सुदृढ गावांना मिळणार ‘आरोग्यसंपन्न गाव’ किताब
