Dainik Maval News : लोणावळा येथे आयोजित वसंत व्याख्यानमालेची सांगता ‘ऋतु हिरवा’ या बहारदार संगीतमय कार्यक्रमाने उत्साहात पार पडली. धनंजय म्हसकर, नचिकेत देसाई आणि केतकी भावे-जोशी या गुणी कलाकारांनी सादर केलेल्या सुरेल मैफलीने आणि अनघा मोडक यांच्या शब्द सुमनानी उपस्थित रसिकांची मनं जिंकत कार्यक्रमाला दाद मिळवून दिली.
या कार्यक्रमाप्रसंगी लोणावळ्याचे नगराध्यक्ष राजेंद्र सोनवणे, उपनगराध्यक्ष देविदास कडू, विद्या निकेतन एज्युकेशन ट्रस्टचे अध्यक्ष माधवराव भोंडे, सचिव राधिका भोंडे, नगरसेवक निखिल कवीश्वर, अनिल गवळी, नगरसेविका आरती तिकोने, मारुती तिकोने, नारायण पाळेकर तसेच वसंत व्याख्यानमाला समितीचे अध्यक्ष नितीन तिकोने आदी मान्यवर उपस्थित होते.
२० ते २६ एप्रिल दरम्यान पार पडलेल्या या व्याख्यानमालेत “सा विद्या या विमुक्तये” या तत्वावर आधारित विविध विषयांची समृद्ध उधळण करण्यात आली. विचारांना चालना देत संस्कारांची ऊब देणाऱ्या या व्याख्यानमालेत विविध विषयांवर प्रभावी मांडणी झाली.
प्रथम पुष्प ‘मायलेकरं’ या अभिवाचन कार्यक्रमातून डॉ. गिरीश ओक, मृणाल देव-कुलकर्णी आणि चैत्राली अभ्यंकर यांनी आई-मुलाच्या नात्याची कोमलता रसिकांसमोर उभी केली. डॉ. अरुणा ढेरे यांच्या संकल्पनेतून साकारलेल्या या सादरीकरणाने भावविश्व समृद्ध केले.
द्वितीय पुष्प ‘शाळा आमची मराठी’ या विषयावर श्रीमती चिन्मयी सुमीत यांनी मातृभाषेचे महत्त्व अधोरेखित करत “भाषा ही संस्कृतीची ओळख आहे” हा संदेश दिला.
तृतीय पुष्प ‘पसायदान’ या विषयावर इंद्रजीत देशमुख यांनी अत्यंत विचारप्रवर्तक व्याख्यान देत माऊलींच्या संदेशाचे आधुनिक संदर्भात विश्लेषण केले. “दुष्टांचा नाश नव्हे, तर त्यांच्या वृत्तीचे परिवर्तन व्हावे,” हा संदेश त्यांनी ठळकपणे मांडला.
चतुर्थ पुष्पात आनंद शिंदे व रोहन तावरे यांनी वन्यजीवांसोबतचे अनुभव कथन करत ‘भूतदया’ या मूल्याची जाणीव करून दिली. पाचव्या पुष्पात ‘नाटक नावाचा ताराफा’ या विषयावर अभिनेते व नाटककार अतुल पेठे यांनी रंगभूमीचे अंतरंग उलगडत “रंगमंच हे जीवनाचे प्रतिबिंब आहे” असे सांगितले.
सहाव्या पुष्पात ‘कलावंतांचे अनुभव’ या सत्रात अतुल शेवते यांनी कलाक्षेत्रातील संघर्ष व समाधान यांचा प्रवास उलगडला.
समारोपाच्या दिवशी ‘रंगाई निर्मित ऋतु हिरवा ’ या विशेष कार्यक्रमातून कु. अनघा मोडक यांच्या संकल्पनेतून आणि प्रशांत लळीत यांच्या संगीत संयोजनातून रंग, स्वर आणि भावना यांचा सुंदर संगम अनुभवायला मिळाला.
एकूणच, विविध विषयांची समृद्ध मेजवानी देत ही वसंत व्याख्यानमाला विचारप्रवर्तक ठरली असून ‘ऋतु हिरवा’ या संगीतमय कार्यक्रमाने तिची संस्मरणीय सांगता झाली.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– वडगाव नगरपंचायतमधील केशवनगर परिसरातील विविध रस्ते विकासकामांचा भूमिपूजन समारंभ संपन्न
– तळेगाव दाभाडे येथील इंद्रायणी महाविद्यालयात अनोख्या पद्धतीने जागतिक पुस्तक दिवस साजरा
– सभापती बदलताच मावळ तालुका खरेदी विक्री संघ अॅक्शन मोडवर ; थेट सहकार मंत्र्यांची भेट घेऊन केली मोठी मागणी
– लोणावळा शहरात ‘व्हिला’ ‘बंगलो’ बुकींगचा स्कॅम ? पर्यटकांची फसवणूक होत असल्याने प्रशासनाकडून कारवाईची अपेक्षा
