Dainik Maval News : आषाढी पायी वारीसाठी जगद्गुरू संत तुकाराम महाराज पालखी सोहळा यंदा सात जुलै रोजी श्री क्षेत्र देहूतून तीर्थक्षेत्र पंढरपूरकडे प्रस्थान ठेवणार आहे, अशी माहिती संत तुकाराम महाराज संस्थानचे पालखी सोहळा प्रमुख विक्रमसिंह महाराज मोरे यांनी दिली.
यावेळी संस्थानचे अध्यक्ष जालिंदर महाराज मोरे, पालखी सोहळा प्रमुख लक्ष्मण महाराज मोरे, उमेश महाराज मोरे, विश्वस्त दिलीप महाराज मोरे आदी उपस्थित होते. श्री. मोरे म्हणाले, ‘‘सात जुलै रोजी दुपारी दोनच्या सुमारास पालखी सोहळ्याचे देहूतील देऊळवाड्यातून प्रस्थान होईल. पहिल्या दिवशी पालखी देहूतील इनामदारवाड्यात मुक्कामी असेल. ८ जुलै रोजी पालखीचा इनामदारवाड्यातून निघून आकुर्डीत मुक्काम असेल.
दिनांक ९ जुलै रोजी सोहळा पिंपरी, कासारवाडीमार्गे पुण्यात नाना पेठेतील निवडुंगा विठ्ठल रुक्मिणी मंदिरात दोन दिवस मुक्कामी राहील. ११ जुलैला हडपसरमार्गे लोणीकाळभोर येथे कदमवाकवस्ती नवीन पालखी तळावर मुक्कामी जाईल. १२ जुलैला सोहळा यवत, १३ जुलैला वरवंड येथे, १४ जुलै रोजी सोहळा उंडवडी गवळ्याची येथे तर १५ जुलैला बारामतीत मुक्काम करेल. १६ जुलै रोजी पालखी सणसर येथे मुक्कामी असेल. काटेवाडी येथे मेंढ्याचे रिंगण होईल. १७ जुलै रोजी बेलवाडीत सोहळ्यातील पहिले गोल रिंगण होईल. त्यानंतर पालखी निमगाव केतकीत मुक्काम करेल.
दिनांक १८ जुलैला इंदापूर येथे दुसरे गोल रिंगण करून मुक्काम करेल. १९ जुलै रोजी पालखी सराटी मुक्कामी असेल. २० जुलै रोजी सोहळा नीरा स्नानानंतर अकलूज येथे तिसरे गोल रिंगण होईल. २१ रोजी माळीनगर येथे पहिले उभे रिंगण होणार आहे. त्यानंतर सोहळा बोरगाव मुक्कामी जाईल. २२ जुलैला दुपारी तोंडले बोंडले येथे धावा होईल. पालखी पिराची कुरोली येथे मुक्कामी राहणार आहे. २३ जुलैला वाखरीजवळील बाजीराव विहीर येथे दुसरे उभे रिंगण होईल. त्यानंतर वाखरीत मुक्काम असेल. २४ जुलै रोजी पादुका अभंग आरती, उभे रिंगण झाल्यानंतर सोहळा पंढरपुरातील संत तुकाराम महाराजांच्या नवीन मंदिरात मुक्कामी जाईल.
‘पालखी रथ नवीन करण्याचा मानस’
यंदाच्या पालखी सोहळा प्रमुखपदी विक्रमसिंह महाराज मोरे, लक्ष्मण महाराज मोरे, उमेश महाराज मोरे यांची निवड संत तुकाराम महाराज संस्थानचे अध्यक्ष जालिंदर महाराज मोरे यांनी बुधवारी (दि. ३) जाहीर केली. संत तुकाराम महाराज संस्थानच्या वतीने पालखी रथ आणि चौघडा वाहनास जुंपण्यासाठी तीन बैलजोडींची खरेदी करणार आहे. तसेच नवीन चांदीचा रथाचे काम सुरू आहे, असेही पालखी सोहळा प्रमुख मोरे यांनी सांगितले.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– पंचायत समिती शिक्षण विभाग आणि राष्ट्रवादी विद्यार्थी काँग्रेस मावळ तालुका यांच्यावतीने दहावी, बारावीच्या गुणवंत विद्यार्थ्यांचा सन्मान
– पिंपरी-चिंचवडमधील अवैध धंद्यावर कडक कारवाई करा ; खासदार श्रीरंग बारणे यांच्या पोलिसांना सूचना
– भोयरे-सावळा मार्ग बनतोय वेगवान ; सुरक्षिततेसाठी आवश्यक ठिकाणी स्पीड ब्रेकर बसविण्याची मागणी
– जनगणनेच्या कामासाठी जात असताना शिक्षिकेचा रस्ते अपघातात मृत्यू ; मावळमधील हृदयद्रावक घटना
