Dainik Maval News : तळेगाव दाभाडे येथील श्री सद्गुरु सेवा मंडळाच्या वतीने अधिक मासानिमित्त आयोजित करण्यात आलेल्या १ कोटी २५ लाख श्री स्वामी समर्थ नामजप सोहळ्याची सांगता अत्यंत भक्तिमय वातावरणात पार पडली. या सांगता समारंभाचे आयोजन मुख्य आयोजक गणेश वसंतराव खांडगे यांच्या निवासस्थानी मोठ्या उत्साहात करण्यात आले होते.
कार्यक्रमाची सुरुवात पहाटे ६ वाजता श्री डोळसनाथ मंदिरापासून भव्य मिरवणुकीने झाली. त्यानंतर १०८ दाम्पत्यांच्या हस्ते श्री स्वामी समर्थ महायज्ञ संपन्न झाला. यानंतर भजन आणि आरतीचे आयोजन करण्यात आले.
या कार्यक्रमाला गुरुवर्य मोहन बुवा रामदासी, स्वराधीश डॉ. भरत बल्लावली तसेच गुरुवर्य विनीत जोशी हे प्रमुख पाहुणे म्हणून उपस्थित होते. सायंकाळी साडेचार वाजता खोपोली येथील भजन मंडळाच्या सादरीकरणाने कार्यक्रमाच्या पुढील सत्रास प्रारंभ झाला.
नामजप सोहळ्यात नियमित सहभागी होणाऱ्या स्वामीभक्तांचा सत्कार मोहन बुवा रामदासी यांच्या हस्ते करण्यात आला. यावेळी डॉ. भरत बल्लावली यांनी नामजपाचे महत्त्व उपस्थितांना पटवून दिले, तर मोहन बुवा रामदासी यांनी आपल्या प्रभावी प्रवचनातून नामस्मरणाचे आध्यात्मिक महत्त्व विशद केले. गणेश महाराज शिंदे यांनीही आपल्या प्रवचनातून उपस्थितांना मार्गदर्शन केले.
कार्यक्रमाच्या समारोपावेळी सुभाष शिरसाट यांच्या मार्गदर्शनाखाली नृत्याविष्कार सादर करण्यात आला. या भावस्पर्शी सादरीकरणाने उपस्थितांच्या डोळ्यांत आनंदाश्रू तरळले.
यावेळी गुरुवर्य मोहन बुवा रामदासी यांनी सांगितले की, १ कोटी २५ लाख नामजप संकल्पाच्या निमित्ताने एकूण ४ कोटी ३० लाख नामजप पूर्ण झाला आहे. कार्यक्रमाची सांगता महाप्रसादाने झाली.
या संपूर्ण सोहळ्यात मोठ्या संख्येने स्वामीभक्त सहभागी झाले होते. भक्ती, श्रद्धा आणि उत्साहाने ओतप्रोत भरलेला हा नामजप सोहळा तळेगाव परिसरातील भाविकांसाठी एक अविस्मरणीय आध्यात्मिक अनुभव ठरल्याची माहिती श्री सद्गुरु सेवा मंडळाचे अध्यक्ष परेश कुलकर्णी यांनी दिली.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– Pawana Dam Update : पवना धरणातील पाणीसाठ्यात झपाट्याने घट; केवळ २१ टक्के पाणीसाठा शिल्लक
– पुणे ग्रामीण पोलीस दलात मोठी खांदेपालट ; ३० पोलीस निरीक्षकांच्या बदल्या जाहीर
– तळेगाव एमआयडीसीमध्ये भीषण दुर्घटना! नवलाख उंब्रे जवळील कंपनीत गॅस गळतीमुळे दोन कामगारांचा मृत्यू, तिघांची प्रकृती गंभीर
– मावळातील औद्योगिक पट्ट्याला मिळणार मोठी चालना; तळेगाव परिसरात नवीन रेल्वे मालधक्का उभारण्याचे नियोजन
