Dainik Maval News : पवन मावळातील गावागावांमध्ये जपली जाणारी ‘लेकी मागण्याची’ पारंपरिक प्रथा यंदाही मोठ्या उत्साहात पार पडली. गौरी-गणपती विसर्जनानंतर आयोजित करण्यात येणाऱ्या या पारंपरिक कार्यक्रमात लहान मुलींपासून ज्येष्ठ महिलांपर्यंत तसेच नागपंचमी आणि गौरीसाठी माहेरी आलेल्या माहेरवाशिणी महिलांनी उत्स्फूर्त सहभाग घेतला. फुगड्या, पारंपरिक गाणी, उखाणे, नकला आणि विनोदी लग्नसोहळ्यामुळे गावागावातील वातावरण आनंदमय झाले.
पवन मावळ परिसरात भात हे प्रमुख पीक असल्याने भात लागवडीनंतर शेतीची कामे तुलनेने कमी होतात. त्यामुळे गावातील प्रत्येक घरातील महिला या कार्यक्रमात सहभागी होतात. गावातील मंदिर किंवा पारावर महिला एकत्र येऊन पारंपरिक गाणी, फुगड्या आणि फेर धरत आनंद साजरा करतात. त्याचबरोबर गावातील राजकीय व्यक्तींसह विविध क्षेत्रातील व्यक्तींच्या बोलण्या-चालण्याच्या विनोदी नकला सादर केल्या जातात.
या कार्यक्रमात उखाणे स्पर्धा, संगीत खुर्ची यांसारख्या मनोरंजनात्मक स्पर्धाही आयोजित केल्या जातात. त्यामुळे महिलांना रोजच्या संसारातील सुख-दुःख काही काळ बाजूला ठेवून मनमोकळेपणाने सहभागी होता येते.
रात्रभर रंगतो पारंपरिक गाण्यांचा कार्यक्रम
‘लेकी मागण्याचा’ हा कार्यक्रम नागपंचमीपासून सुरू होणाऱ्या पारंपरिक उत्सवाच्या वातावरणाचा एक भाग असून, गौरी-गणपती विसर्जनानंतर त्याची सांगता होते. या काळात रात्री महिलांच्या घरी पारंपरिक गाणी, फुगड्या आणि नकला सादर केल्या जातात. सहभागी महिलांसाठी आयोजकांच्या घरी चहा-नाश्त्याची व्यवस्था केली जाते.
दोन दिवस चालणाऱ्या या कार्यक्रमात पहिल्या दिवशी रात्रभर गाणी आणि विविध मनोरंजनाचे कार्यक्रम होतात. दुसऱ्या दिवशी सकाळपासून पुन्हा गाणी आणि इतर कार्यक्रम रंगतात. त्यानंतर दुपारी सुमारे एक वाजता पारंपरिक विनोदी विवाह सोहळ्याला सुरुवात होते.
मुलीच्या घरी ‘मुलगी मागायला’ जाते वराकडची मंडळी
या विवाह सोहळ्यासाठी एखाद्या लहान मुलीला मुलाच्या वेशात सजविले जाते. त्यानंतर वराकडील मंडळी मुलीच्या घरी ‘मुलगी मागण्यासाठी’ जातात. नेहमीच्या विवाहपद्धतीची हुबेहूब नक्कल न करता हा संपूर्ण सोहळा विनोदी आणि मनोरंजक शैलीत सादर केला जातो.
पसंतीनंतर विवाहाची तयारी सुरू होते. ढोल-ताशांच्या गजरात ‘नवरा-नवरीची’ वरात काढली जाते. या वरातीत महिला मनसोक्त नाचत-गात सहभागी होतात. साधारण तास ते दीड तास चालणाऱ्या या वरातीनंतर पारंपरिक पद्धतीने विवाह सोहळा पार पडतो. उपस्थित सर्वांसाठी भोजनाची व्यवस्थाही केली जाते.
या पारंपरिक कार्यक्रमाला गावातील पुरुष मंडळींकडूनही आवश्यक ते सहकार्य मिळते. त्यामुळे महिलांच्या सहभागातून पिढ्यान्‌पिढ्या जपली गेलेली ही ग्रामीण लोकपरंपरा आजही पवन मावळातील गावांमध्ये उत्साहाने अनुभवायला मिळत आहे.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा
– दुःखद घटनांच्या पार्श्वभूमीवर वडगाव शहरात गणेश मंडळांकडून विसर्जन मिरवणुका रद्द ; साधेपणाने बाप्पाला निरोप
– पुढच्या वर्षी लवकर या… पवनानगर परिसरात दीड दिवसांच्या गणरायाला भक्तिमय वातावरणात निरोप
– टाकवे बुद्रुक बाललैंगिक अत्याचार प्रकरण : खटला ‘फास्टट्रॅक’वर चालवून आरोपीला कठोर शिक्षेची तृप्ती देसाईंची मागणी
– ‘मावळचे भाग्यविधाते’ माजी मंत्री मदन बाफना यांना शासकीय इतमामात अखेरचा निरोप
