Dainik Maval News : राज्य शासनाची ‘पुण्यश्लोक अहिल्यादेवी होळकर शेतकरी कर्जमुक्ती योजना’ राबविण्यासाठी पुणे जिल्हा मध्यवर्ती सहकारी बँकेने (पीडीसीसी) जिल्ह्यातील १ लाख ८ हजार ४१ थकीत कर्जदारांचा तपशील संबंधित पोर्टलवर अपलोड केला आहे. त्यामुळे पात्र शेतकऱ्यांना योजनेचा लाभ वेळेत मिळण्यास मदत होईल, अशी माहिती पुणे ग्रामीणचे जिल्हा उपनिबंधक (सहकारी संस्था) प्रकाश जगताप यांनी दिली.
- सहकार विभागाच्या पुणे ग्रामीण जिल्हा उपनिबंधक कार्यालयाने योजनेच्या प्रभावी अंमलबजावणीसाठी पीडीसीसी बँकेला पात्र कर्जदारांचा तपशील पोर्टलवर अपलोड करण्याच्या सूचना दिल्या होत्या. त्यानुसार जिल्ह्यातील सर्व पात्र थकीत कर्जदारांची माहिती पोर्टलवर नोंदविण्यात आली आहे.
मात्र योजनेसाठी पात्र असलेल्या ११३ मृत शेतकऱ्यांच्या वारसांची नोंद अद्याप पूर्ण झालेली नसल्याने त्यांच्या खात्यांचा तपशील अपलोड करता आलेला नाही. तसेच २९ पात्र सभासदांचे आधार क्रमांक उपलब्ध नसल्याने त्यांची माहितीही पोर्टलवर नोंदविता आलेली नाही, असेही प्रकाश जगताप यांनी सांगितले.
मृत सभासदांच्या वारसांनी वारस नोंदणीची प्रक्रिया तातडीने पूर्ण करावी. तसेच आधार क्रमांक उपलब्ध नसलेल्या सभासदांनी आवश्यक माहिती संबंधित संस्थेकडे जमा करावी, जेणेकरून त्यांचाही तपशील पोर्टलवर अपलोड करून योजनेचा लाभ देता येईल, असे आवाहन जगताप यांनी केले आहे.
तालुकानिहाय अपलोड झालेले थकीत कर्जदार (तालुका – कर्जदार)
आंबेगाव – ३,३९०
बारामती – १३,७२८
भोर – ७,२४२
दौंड – १९,५६२
हवेली – ४,१६८
इंदापूर – १८,८१८
जुन्नर – ७,७७८
खेड – ७,८५३
मावळ – ५,१७२
मुळशी – २,३८७
पुरंदर – ७,९०३
शिरूर – ८,४५२
वेल्हा – १,८८८
एकूण – १,०८,०४१
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा :
– पवना बंदिस्त जलवाहिनी प्रकल्पाविरोधात शेतकऱ्यांचा पुन्हा एल्गार ! बुधवारी धरणे आंदोलन
– केतन अग्रवाल हत्या प्रकरण । सिया गोयल, चेतन चौधरी यांच्या पोलीस कोठडीत ३ जुलैपर्यंत वाढ
– मुंबई-पुणे द्रुतगती मार्गावरील ‘मिसिंग लिंक’ प्रकल्पाला वीर शिंग्रोबा धनगर यांचे नाव देण्याची मागणी
