Dainik Maval News : वडगाव शहरातील काही प्रभागांमध्ये अनियमित पाणीपुरवठा होत आहे. नागरिकांच्या होणाऱ्या गैरसोयीबाबत विरोधकांनी केलेल्या तक्रारीच्या अनुषंगाने सोमवारी (दि. 8 जून) बैठक आयोजित करण्यात आली होती. यामध्ये विरोधी पक्षनेत्या अर्चना म्हाळसकर, नगरसेवक विशाल वहिले, सारिका चव्हाण यांनी प्रामुख्याने त्यांच्या प्रभाग क्रमांक ६, ९ आणि १७ मध्ये अनियमित पाणीपुरवठा होत असल्याबाबत तक्रार करत प्रत्येक घरापर्यंत नियमित पुरेसा व स्वच्छ पाणीपुरवठा करावा, त्यादृष्टीने आवश्यक उपाययोजना कराव्यात, अशी मागणी केली.
यावेळी विरोधक आणि सत्ताधारी तसेच प्रशासकीय अधिकारी यांच्यात पाणीपुरवठ्याच्या मुद्दयावरून आरोप-प्रत्यारोप झाले. नागरिकांच्या आक्रमक भूमिकेनंतर मुख्याधिकारी प्रवीण निकम आणि उपनगराध्यक्ष तथा पाणीपुरवठा सभापती सुनील ढोरे यांनी गंभीर पाणीटंचाई असलेल्या भागांमध्ये तातडीने टँकरद्वारे पाणीपुरवठा करण्यात येईल, असे आश्वासन दिले. यावेळी नगरसेवक अजय म्हाळसकर, गणेश म्हाळसकर, पंढरीनाथ ढोरे, अतुल राऊत, शिवाजी घारे, नगरपंचायत अधिकारी व कर्मचारी, ग्रामस्थ आदी उपस्थित होते.
नवीन पाणीपुरवठा योजनेचे सुरू असलेले काम तसेच अनियमित विद्युतपुरवठा यामुळे पाणीपुरवठा नियमितपणे करण्यास काही अडचणी निर्माण होतात. ज्या भागात पाणीटंचाई भासेल त्या भागात टँकरने पाणीपुरवठा केला जाईल. – डॉ. प्रवीण निकम, मुख्याधिकारी
आमदार सुनील शेळके यांच्या माध्यमातून राबविण्यात आलेल्या नवीन जलशुद्धीकरण व पाणीपुरवठा योजनेचे काम अंतिम टप्प्यात आहे. ती योजना पूर्ण झाल्यावर संपूर्ण शहराला सुरळीत व स्वच्छ पाणीपुरवठा होणार आहे. त्यामुळे नागरिकांचे सहकार्य आवश्यक आहे. – सुनील ढोरे, उपनगराध्यक्ष
शहराच्या सर्व प्रभागांमध्ये स्वच्छ व सुरळीत पाणीपुरवठा व्हावा ही नगरपंचायत प्रशासनाची जबाबदारी आहे. त्यादृष्टीने नगरपंचायत प्रशासनाने पाणीटंचाई टाळण्यासाठी आवश्यक त्या उपाययोजना त्या त्या वेळी करणे आवश्यक आहे. – अर्चना म्हाळसकर, विरोधी पक्षनेत्या
जनतेच्या मूलभूत हक्कांसाठी आमचा संघर्ष सुरूच राहील. वडगाव शहरातील पाणीपुरवठा सुरळीत होईपर्यंत नागरिकांच्या न्याय्य हक्कासाठी सातत्याने पाठपुरावा करण्यात येईल. – विशाल वहिले, नगरसेवक
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– प्रस्तावित बऊर-करुंज-ब्राह्मणवाडी एमआयडीसी प्रकल्प : स्थानिक ग्रामस्थांचा विरोधी सूर कायम
– खासदार श्रीरंग बारणे : बारा वर्षात लोकसभेतील चर्चेत सर्वाधिक सहभाग ; ३६ खासगी विधेयके सादर, ९६ टक्के उपस्थिती
– आषाढी वारीसाठी जगद्गुरू संत तुकाराम महाराज पालखी सोहळ्याचे वेळापत्रक जाहीर ; ७ जुलैला होणार पंढरपूरकडे प्रस्थान
– तळेगाव दाभाडे येथे अल्पवयीन मुलीचा विनयभंग, फोटो व्हायरल करण्याची धमकी देत अत्याचार, तिघांविरुद्ध गुन्हा दाखल
